Oʻzbekiston milliy teleradiokompaniyasiga qarashli bir qator telekanallar tuzilmasi va ulardagi rahbarlar tarkibi oʻzgardi, deya xabar berdi Daryo.

Xabarda yozilishicha, bu boʻyicha Prezidentning tegishli farmoni imzolangan.

Unga koʻra, Oʻzbekiston milliy teleradiokompaniyasi tizimidagi tashkilotlarni qayta tashkil qilish dasturi boʻyicha telekanallar bir qator birlashmalar tarkibiga qoʻshildi.

Jumladan:

▪️ “Oʻzbekiston 24” ijodiy birlashmasi tarkibiga “Oʻzbekiston 24”, “Oʻzbekiston”, “Dunyo boʻylab” telekanallari va “Oʻzbekiston 24” radiokanali;

▪️ “Maʼrifat” ijodiy birlashmasi tarkibiga “Madaniyat va maʼrifat”, “Oʻzbekiston tarixi”, “Bolajon” va “Kinoteatr” telekanallari;

▪️ “Yoshlar” ijodiy birlashmasiga “Yoshlar”, “Navo” telekanallari va “Yoshlar” radiokanali;

▪️ “Sport” ijodiy birlashmasi tarkibiga “Sport” va “Futbol TV” telekanallari oʻtkazildi.

Taʼkidlanishicha, “Oʻzbekiston24” ijodiy birlashmasiga Haydar Hasanov, “Maʼrifat” ijodiy birlashmasiga Vohid Luqmonov, “Yoshlar” ijodiy birlashmasiga Husniddin Ergashev, “Sport” ijodiy birlashmasiga esa Zohid Karimov 3 oylik sinov muddati bilan vaqtincha direktor vazifasini bajaruvchi boʻlgan.

Bundan tashqari, ijodiy birlashmalar tarkibidagi telekanallarga 3 oylik sinov muddati bilan oʻrinbosar vazifasini vaqtincha bajaruvchilar ham tayinlangan.

Xususan, “Oʻzbekiston 24” telekanaliga Shunqor Choriyev, “Madaniyat va maʼrifat” telekanaliga Orif Ahmedov, “Oʻzbekiston” telekanaliga Dilshod Fayz, “Navo” telekanaliga Nasriddin Asriddinov, “Oʻzbekiston tarixi” telekanaliga Alisher Shoimov, “Futbol TV” telekanaliga Darmon Ibrohimov direktor oʻrinbosari boʻlgan.

“Mahalla” teleradiokanali esa moliyaviy mustaqil telekanal hisoblangani uchun Davlat byudjeti mablagʻlari hisobidan davlat buyurtmasini bajarish sharti bilan loyihaviy moliyalashtirish tizimiga oʻtkazilgan. Mazkur telekanal direktori sifatida Ikrom Choriyev faoliyat yuritadi.