“Temir yoʻl transporti sohasida davlat tomonidan tartibga solinadigan va bozor tamoyillari asosida koʻrsatiladigan xizmatlar roʻyxatini tasdiqlash toʻgʻrisida”gi Hukumat qarori qabul qilindi.

Hujjatga koʻra, quyidagilar tasdiqlandi:

▪️ Temir yoʻl transporti sohasida davlat tomonidan tartibga solinadigan xizmatlar roʻyxati;

▪️ Temir yoʻl transporti sohasida bozor tamoyillari asosida koʻrsatiladigan xizmatlar roʻyxati;

▪️ Temir yoʻl transporti sohasida isteʼmolchilarga bepul koʻrsatiladigan xizmatlar roʻyxati.

Tartibga solinadigan xizmatlarga temir yoʻl transportida yoʻlovchilari tashish, umumiy foydalanishdagi temir yoʻl transporti infratuzilmasi xizmatlari, lokomotivlarni magistral yoʻllarda taqdim etish kabilar kiradi.

Bozor tamoyillari asosida koʻrsatiladiganlarga esa temir yoʻl transportida yoʻlovchilari tashish, yoʻlovchilarni tashishda koʻrsatiladigan qoʻshimcha xizmatlar(bunga yoʻlovchining xohishiga binoan boʻsh oʻrin mavjud boʻlganda vagonning sinfini oʻzgartirish), vokzallarda yoʻlovchilar va kuzatuvchilarga koʻrsatiladigan xizmatlar(planshetda elektron kutubxona taqdim etish, yoʻlovchining qoʻl yukini tashish, chiptalarni uyga yetkazib berish, yoʻl davomida qadoqlangan suv yoki qahva taqdim etish, sartaroshxona va boshqa maishiy xizmatlarni koʻrsatish kabilar), temir yoʻl transportida yuklarni tashish va boshqalar kiradi.

Bepul koʻrsatiladigan xizmatlar roʻyxati quyidagicha:

▪️ aravacha taqdim etish;

▪️ chiptasi boʻlgan yoʻlovchilarga hojatxonalarda boʻlish;

▪️ ona va bola xonasidan foydalanish;

▪️ kutish zalida Wi-Fi'dan foydalanish;

▪️ tibbiy yordam punkti xizmatlari;

▪️ nogironlar uchun aravacha;

▪️ yoʻl davomida telefon va noutbuklarni quvvatlash xizmati;

▪️ kutubxona;

▪️ yoʻl davomida choy, ichimlik suvi, shakar(oq qand) taqdim etish.