Oʻzbekistonda ikki qanotli hasharotlar (“Diptera”) turkumining yirtqich pashshalar (“Asilidae”) oilasiga mansub 2 ta yangi pashsha turi kashf etildi.

Fan uchun nomaʼlum boʻlgan yangi tur Samarqand davlat universiteti olimlari boshchiligidagi entomologlar jamoasi tomonidan Toshkent va Qashqadaryo viloyati hududidan topilgan.

Maʼlumot uchun, shu vaqtga qadar yirtqich pashshalar (“Asilidae”) oilasiga kiruvchi 4 ta tur mamlakatimizda uchrashi maʼlum edi. Yangilikdan soʻng ularning soni 6 taga yetdi.

Yangi turlarning biriga oʻzbek entomologi, Samarqand davlat universiteti dotsenti Erkin Abdullayevning nomi berilgan.

Endilikda bu 2 turdagi pashsha fanda mos ravishda Dioctria abdullayevi hamda Dioctria hissarica deb ataladi.