2025-yilda tariflar ikki marta — oʻn besh foizdan oshishi mumkin. Bu haqida qurilish va uy-joy kommunal xoʻjaligi vazirligi boshqarma boshligʻi Ilhom Toʻrayev maʼlum qildi.

Uning soʻzlariga koʻra, toʻlovlarni davlat tomonidan qoplab berishda juda katta subsidiya bor.

“Subsidiyadan qutilish va tizimni yangilash uchun biz narxlarni qayta koʻrib chiqishimiz kerak. Bunda nafaqat narxlarni, toʻlov tizimni ham qayta koʻrish lozim”, degan u.

Vazirlik mutasaddisi Toshkent shahrida isitish tizimi uchun byudjetdan ajratilgan mablagʻlar qay darajada toʻgʻri sarflanyapti, degan savolga javob bermagan.

Maʼlumot uchun, joriy yilda tarif narxlari viloyatlarda bir marta, poytaxtda esa ikki marta oshirilgan.