Bokuda boʻlib oʻtgan “Turon elektron tijorat va eksport” forumida yangi “Made in Turan” savdo markasi taqdim qilindi.

Ozarbayjon franchayzing assotsiatsiyasi boshqaruv raisi Jamid Movsumovga koʻra, “Made in Turan” savdo markasi ostida turkiy mamlakatlarning yuqori sifatli oziq-ovqat va nooziq-ovqat mahsulotlari ishlab chiqariladi. Bu orqali turkiy davlatlar mahsulotlarini dunyo bozorida targʻib qilish maqsad qilingan. Assotsiatsiya masʼulining fikriga koʻra, brend sifat belgisi boʻladi. Ushbu marka ostida mahsulot ishlab chiqaruvchilar esa bojxona imtiyozlariga ega boʻlishi mumkin.

Savdo markasining ilk mahsulotlari milliy oziq-ovqat va kiyim-kechaklar boʻladi.

“Biz tovar va xizmatlarning yanada keng doirasini taqdim etish niyatidamiz”– deydi Movsumov.