Kecha, 14-noyabr kuni boʻlib oʻtgan yigʻilishda Shavkat Mirziyoyev kasalliklarni erta aniqlash va samarali davolashga oid takliflar taqdimoti bilan tanishdi.

Eʼtiborli jihati, takliflar qatorida donorlarni qoʻllab-quvvatlashni kengaytirish ham aytildi.

Jumladan, endi “Oʻzbekiston Respublikasi faxriy donori” koʻkrak nishoni olganlarga bir yoʻla beriladigan pul mukofoti bazaviy hisoblash miqdorini 5 baravaridan 15 baravarigacha oshiriladi.

Bundan tashqari, ularga jamoat transportidan bepul foydalanish hamda davlat sihatgohlarida davolanish jarayonida navbatsiz koʻrinish huquqlari beriladi.

Ushbu yangi tizim kelgusi yil 1-yanvardan joriy qilinishi belgilangan.

Maʼlumot uchun, “Oʻzbekiston Respublikasi faxriy donori” koʻkrak nishonini taʼsis etish boʻyicha Hukumat qarori 2014-yil 23-iyul kuni qabul qilingan.

Koʻkrak nishoni donorlarga har yili 14-iyunda – Jahon donor kunida taqdim etiladi.

Ushbu koʻkrak nishoni bilan oʻz qonini kamida 40 marta yoki uning tarkibiy qismlaridan bir qismini kamida 60 marta bepul topshirgan shaxs mukofotlanadi.