Nomoddiy madaniy merosni muhofaza qilish, ilmiy oʻrganish va keng targʻib qilish maqsadida oʻtkazilishi rejalashtirilgan Respublika ilmiy tadqiqotlar tanloviga start berildi.

Unda olimlar, mustaqil tadqiqotchilar, soha mutaxassislari va talaba-yoshlar ilmiy tadqiqot ishlari bilan ishtirok etishlari mumkin.

Tanlov Respublika Maʼnaviyat va maʼrifat markazi, Oliy taʼlim, fan va innovatsiyalar vazirligi Madaniyat vazirligi hamkorligida tashkil etilmoqda.

10-noyabrgacha qabul qilinadigan ilmiy maqolalar quyidagi 5 ta yoʻnalishda boʻlishi lozim:

▪️ oʻzlikni namoyon qilish (folklor)ning ogʻzaki anʼanalari va shakllari;

▪️ ijrochilik sanʼati (maqomchilik, sozandachilik, raqs, taqlidchilik, soʻz ustasi, qoʻgʻirchoqbozlik, dorbozlik,..);

▪️ jamiyat urf-odatlari, marosim va bayramlari (oilaviy, xalq, kasbiy va mavsumiy marosimlar);

▪️ tabiat va koinot bilan bogʻliq bilim va urf-odatlar (tabobat va koinot bilan bogʻliq marosimlar, anʼanaviy tabobat, milliy taomlar);

▪️ anʼanaviy hunarmandchilik (qoʻgʻirchoqsozlik, kulolchilik, ganchkorlik, doʻppidoʻzlik, miniatyura) bilan bogʻliq bilim va koʻnikmalar.

Tanlov gʻoliblari BHMning 20 baravari miqdoridagi pul mukofoti (6 mln 800 ming soʻm) va esdalik sovgʻalari bilan taqdirlanadi.