Foto: Gazeta.uz

Fuqarolar jamoat joylarida tartibni saqlash uchun beshta muhim qoidani yodda tutishlari lozim.

1-qoida — Jamoat joylaridagi barcha qonun va qoidalarga amal qilish. Bunda jamoat joylarida tamaki chekish, spirtli ichimliklar isteʼmol qilish yoki ovozni balandlatish kabi taqiqlangan harakatlardan tiyilish nazarda tutiladi.

2-qoida — Boshqa fuqarolarga nisbatan hurmat va odobni saqlash. Ushbu qoida navbatda turish, boshqalarga yoʻl berish va jamoat transportida oʻrin berish kabi odob-axloq qoidalariga amal qilishni oʻz ichiga oladi.

3-qoida — Tozalikka rioya qilish. Jumladan, har bir shaxs jamoat joylarini toza saqlash uchun chiqindilarni maxsus belgi qoʻyilgan joylarga tashlash shart. Bu bilan u atrof-muhitni muhofaza qilishga yordam berish bilan birga oʻz burchini ham bajargan boʻladi.

4-qoida — Xavfsizlik qoidalariga amal qilish. Fuqarolar jamoat joylarida xavfsizlik qoidalariga amal qilishi lozim. Bunga yoʻl harakati qoidalariga rioya qilish, xavfsizlik belgi va koʻrsatmalariga amal qilish kabilar kiradi.

5-qoida — Jamoat mulkini muhofaza qilish, uni ehtiyotlash va buzmaslik. Masalan, har bir shaxs xiyobonlar, oʻrindiqlar, fontanlar va boshqa jamoat joylarini muhofaza qilishni oʻzlarining burchi va vazifasi deb bilishi lozim.

Mazkur 5 ta qoidadan tashqari jamoat joyida quyidagi xatti-harakatlarni amalga oshirish ham taqiqlanadi:

▪️ tamaki mahsulotlarini isteʼmol qilish, shuningdek chilim va elektron sigaretalar chekish;

▪️ uyatli soʻzlar bilan soʻkinish, haqoratomuz shilqimlik qilish hamda jamoat tartibini va fuqarolarning osoyishtaligini buzuvchi shu kabi boshqa xatti-harakatlarni sodir etish;

▪️ alkogol mahsulotini isteʼmol qilish;

▪️ tilanchilik qilish;

▪️ roʻyxatdan oʻtkazilmagan bayroqlar va vimpellardan foydalanish;

▪️ it va mushuklarni tumshuqbogʻsiz va yetovsiz olib yurish.

Maʼlumot uchun, fuqarolarning jamoat joylarida mazkur harakatlarni sodir etishi maʼmuriy yoki jinoiy javobgarlikka tortilishiga asos boʻladi.