Oʻzbekiston Respublikasi Qonuni bilan Jinoyat hamda Maʼmuriy javobgarlik toʻgʻrisidagi kodekslarga oʻzgartirish va qoʻshimchalar kiritildi.

Jumladan, kodekslarga sogʻliqning qisqa muddatga yomonlashuviga yoki mehnat qobiliyatining uncha uzoq boʻlmagan muddatga yoʻqolishiga olib kelmagan qasddan badanga yengil shikast yetkazish bilan bogʻliq jinoiy qilmish jinoiy jazo tarkibidan chiqariladi va bu turdagi xatti-harakatlar maʼmuriy huquqbuzarlik toifasiga oʻtkaziladi.

Shuningdek, Maʼmuriy javobgarlik toʻgʻrisidagi kodeksni yangi tavsifiy belgilar bilan toʻldirish, yarashuv institutiga kiruvchi maʼmuriy huquqbuzarliklar doirasini kengaytirish belgilanmoqda.

Mazkur kodeksga kiritilgan qoʻshimchaga koʻra, ushbu huquqbuzarlik maʼmuriy jazo chorasi qoʻllanilganidan keyin bir yil davomida takror sodir etilgan boʻlsa, jazo tartibi kuchaytiriladi. Xususan:

▪️ BHMning 5 baravaridan 25 baravarigacha miqdorda jarima solishga;

▪️ 15 sutkagacha muddatga maʼmuriy qamoqqa olishga sabab boʻlishi belgilanmoqda.

Qonun rasmiy eʼlon qilingan kundan eʼtiboran kuchga kiradi.