Oʻzbekistonlik fransuz tili oʻqituvchilari malaka oshirish uchun grant asosida Fransiyaga yuboriladi.

Maktabgacha va maktab taʼlimi vazirining maʼlum qilishicha, u kecha, 7-oktyabr kuni Nitsadagi Frankofoniya universiteti rahbari Yann Librati bilan uchrashuv oʻtkazgan va unda Librati Oʻzbekiston fransuz tili yoʻnalishida mintaqaviy “hab”ga aylanishiga ishonch bildirgan.

Uchrashuvda turli malaka oshirish dasturlari va oʻzaro tajriba almashuvlarni jadallashtirish muhimligi qayd etilgan.

Tomonlar, shuningdek, pedagogika sohasida 2025-yil davomida 200 nafar oʻzbekistonlik fransuz tili oʻqituvchilarini grant asosida Fransiyaga malaka oshirishga yuborish boʻyicha kelishuv imzolagan.

Maʼlumot uchun, hozirgi kunda Oʻzbekistonda fransuz tili 600 ga yaqin maktablarda xorijiy til sifatida va 100 ga yaqin maktablarda ikkinchi xorijiy til sifatida oʻqitib kelinmoqda.