Bugun, 7-oktyabr kuni, soat 15:45 da Qashqadaryo viloyati Qarshi tumaniga qarashli “Dasht” MFY hududida joylashgan avtomobillarga suyultirilgan gaz quyish shoxobchasida Kamaz-512 rusumli avtomobilidan sigʻimga (yomkostga) gaz quyish vaqtida gaz-havo aralashmasining chaqnashi sodir boʻlgan. Chaqnash natijasida yongʻin yuzaga kelgan.

FVV 4 ta yongʻin-qutqaruv ekipaji soat 15:56 da hodisa joyiga yetib borib, voqea joyi soat 16:00 da oʻrab olingani va yongʻin soat 16:45 da oʻchirilganini maʼlum qildi.

Hodisa natijasida shoxobcha binosining 22 kv/m maydonida tom qismi yonib, zararlangan. Tan jarohati olgan va vafot etganlar aniqlanmagan.

Hozirda yongʻin sababi va moddiy zarar miqdori aniqlanmoqda.

Voqea joyiga viloyat va tuman FVB rahbar xodimlari yetib kelgan.