Prezident Farmoni bilan Chiqindilarni boshqarish va sirkulyar iqtisodiyotni rivojlantirish agentligi tashkil etiladi.

Sanitar tozalash ishlarini tashkil etish respublika markazi negizida tuziladigan agentlik chiqindilar bilan ishlash masalalarida aholi va sanitar tozalash korxonalari oʻrtasida bogʻlovchi boʻgʻin sifatida faoliyat yuritadi.

Yangi tashkilot chiqindilar bilan bogʻliq ishlarni amalga oshirish sohasida yagona meʼyorlar va standartlarni ishlab chiquvchi, sinovdan oʻtkazuvchi va amaliyotga tatbiq etuvchi, ushbu yoʻnalishdagi faoliyatni muvofiqlashtiruvchi hamda chiqindilarni boshqarish sohasiga taalluqli davlat mulkini boshqaruvchi masʼul davlat organi boʻladi.

Maʼlumot uchun, keyingi yilning 1-martidan sanitar tozalash korxonalari faoliyatining asosiy samaradorlik koʻrsatkichlarini aniqlash mezonlari tasdiqlanadi.