Prezident qarori bilan Fan olimpiadalari markazi tashkil etiladi.

U Ixtisoslashtirilgan taʼlim muassasalari agentligi huzurida davlat muassasasi shaklida ish yuritadi.

Shuningdek, 2025-yildan boshlab 5–8-sinf oʻquvchilari oʻrtasida oʻtkaziladigan olimpiadalarda yuqori natijalarni qayd etgan iqtidorli oʻquvchilar bazasi shakllantiriladi va ularni xalqaro olimpiadalarga maqsadli tayyorlash yoʻlga qoʻyiladi.

Bundan tashqari, asosiy fan olimpiadalarining hududiy bosqichida muvaffaqiyatli ishtirok etgan iqtidorli yoshlar uchun “Intellektual oromgohlar” tashkil qilinadi.

Ragʻbatlantirish tartibiga ham oʻzgartirish kiritiladi. Jumladan, nufuzli xalqaro olimpiadalarda ishtirok etadigan terma jamoalar rahbarini ham jamoaning natijasiga qarab ragʻbatlantirish tartibi joriy etiladi.

Shu bilan birga, terma jamoalar rahbari nufuzli xalqaro olimpiadalarda erishilgan har bir oltin, kumush, bronza medallari uchun tegishlicha bazaviy hisoblash miqdorining 35, 25, 15 baravari miqdorida bir martalik pul mukofoti bilan taqdirlanadi.

Bunda pul mukofotlari va beriladigan sovgʻalar daromad soligʻidan ozod etiladi. Ushbu imtiyoz asosiy olimpiadalarning hududiy va respublika bosqichlarida gʻolib boʻlgan oʻquvchilar va ularning ustozlariga ham taalluqlidir.

Taʼkidlanishicha, keyingi yilning may oyiga qadar asosiy olimpiadalarning respublika bosqichi gʻoliblariga medal berish tizimi joriy etiladi.

Prezident qarorida, shuningdek, bir qator fanlar boʻyicha olimpiadalar muntazam oʻtkazib borilishi ham belgilangan.

Bular:

▪️ millatlararo totuvlik va bagʻrikenglik hissini shakllantirish, madaniy-maʼrifiy aloqalarni mustahkamlash yoʻnalishida — Buyuk Sharq Renessansi xalqaro olimpiadasi;

▪️ matematika va informatika yoʻnalishida — Al Xorazmiy nomidagi yoshlar turkiy olimpiadasi;

▪️ kimyo yoʻnalishida — Abu Rayhon Beruniy nomidagi Xalqaro kimyo olimpiadasi;

▪️ fizika yoʻnalishida — Ahmad al-Fargʻoniy nomidagi Xalqaro fizika olimpiadasi;

▪️ biologiya yoʻnalishida — Abu Ali Ibn Sino nomidagi Xalqaro biologiya olimpiadasi.