Oʻzbekistonliklar ayni kunning eng zamonaviy smartfoni boʻlgan, 20-sentyabrda rasman sotuvga chiqariladigan iPhone 16 telefonlarini sotib olish uchun necha kun ishlashi kerak deb oʻylaysiz?

Bankir kanalining yozishicha, Oʻzbekistondagi eng yirik gadjetlar bozori boʻlgan “Malika” savdo markazidagi ayrim doʻkonlar allaqachon ushbu qurilma uchun oldindan buyurtmalarni qabul qilishni boshlab yuborgan.

Narxlar esa smartfonlarning darajasiga qarab farq qiladi. Jumladan:

▪️ iPhone 16 – 1200 dollardan;

▪️ iPhone 16 Pro – 1700 dollardan;

▪️ iPhone 16 Pro Max – 2050 dollardan.

Maʼlumot uchun, ayni vaqtda 1 AQSh dollari tijorat banklarida 12 750 soʻm atrofidagi narxlarda baholanmoqda.

Oʻzbekistonda rasmiy oʻrtacha ish haqi soʻnggi maʼlumotlar boʻyicha 5,1 mln soʻm hisoblanadi. Bu kuniga 170 ming soʻm degani.

Shu hisobda, oʻrtacha maosh oladigan oʻzbekistonlik iPhone 16ʼning oddiy versiyasini sotib olish uchun 90 kun ishlashiga toʻgʻri keladi.

iPhone 16 Pro modeli uchun oʻrtacha maosh oladigan fuqarolar 128 kun, iPhone 16 Pro Max uchun esa 154 kun ishlashi kerak. Biroq bu taxminan hisoblab chiqilgan maʼlumot. Chunki oylik maosh turlichadir. Shundan kelib chiqib aytish mumkinki, koʻp maosh oladigan shaxslar ertaroq, kam oylik oladiganlar esa kechroq muddatda ushbu qurilmani qoʻlga kiritishi mumkin.

Masalan, bank xodimlariga iPhone 16 Pro Max sotib olishi uchun 54 kun yetarli boʻlsa, oʻqituvchilar uchun 225 kun kerak boʻladi.

Xabarda keltirilishicha, bir necha haftadan soʻng narxlar ancha pasayishi mumkin va Pro Max modeli 1300 dollar atrofida sotiladi. Hisoblash jarayoni faqat oldindan buyurtma uchun amal qiladi.

Shuningdek, maʼlumotda AQSh fuqarosining iPhone 16 Pro Max sotib olishi uchun 6 kun ishlashi yetarli ekani ham misol tariqasida aytib oʻtilgan.

Eslatma. Oʻtgan hafta Apple kompaniyasi iPhone 16 smartfonlarini taqdim qildi. Rasmiy sotuv esa 20-sentyabrdan boshlanadi.