14-sentyabr kuni Londondagi Kolizey teatrida Madaniyat va sanʼatni rivojlantirish jamgʻarmasi tomonidan Oʻzbekiston milliy baleti ishtirokida “Lazgi. Muhabbat va qalb raqsi” spektaklining Britaniyadagi ilk namoyishi boʻlib oʻtdi.

Xabarda yozilishicha, nemis xoreografi Raul Raymondo Rebek tomonidan yaratilgan spektakl Buyuk Britaniya madaniy sahnasida muhim voqea boʻldi.

“Lazgi” tomoshabinlarga afsonaviy Ipak yoʻli manzarasida muhabbat va oʻlmas ruh haqidagi abadiy hikoyani taqdim etdi”, deyiladi jamgʻarma xabarida.

Taʼkidlanishicha, Markaziy Osiyo xalq anʼanalari va madaniyatini oʻzida mujassam etgan ushbu raqs oʻzining kuchli xoreografiyasi, ajoyib yorugʻlik aks-taʼsirlari va chuqur hissiy koʻtarinkiligi bilan tomoshabinlarni hayratga solgan.