Bugun, 11-sentyabr kuni Oʻzbekiston musulmonlari idorasi raisi, muftiy Shayx Nuriddin Xoliqnazar hazratlari raisligida Toshkent shahar imom-xatiblarining tanqidiy-tahliliy yigʻilishi boʻlib oʻtdi.

Xabarda keltirilishicha, unda ayrim imom-domlalar zimmasidagi birlamchi vazifasiga jiddiy yondashmayotgani, moʻmin-musulmonlar ehtiyojini taʼminlashda yetarli saʼy-harakat qilmayotgani va ijro intizomidagi nuqsonlar qattiq tanqid ostiga olingan. Belgilangan tartib-qoidalar, mehnat shartnomalari talablari va lavozim yoʻriqnomalariga rioya etmayotgan imom-domlalarga esa chora koʻrilgan.

Jumladan, 2024-yilning oʻtgan sakkiz oyida mana shunday xato-kamchiliklarni sodir etgan, din peshvosi sifatida ish faoliyatiga eʼtibor qaratmagan va mehnat majburiyatlarini yetarli darajada bajarmagan Toshkent shahridagi masjidlarda faoliyat yuritgan 8 nafar imom-xatib, 10 nafar imom noibi vazifasidan ozod etilgan. Bundan tashqari, 2 nafar imom-xatib va 2 nafar imom noibiga hayfsan intizomiy chorasi qoʻllanilgan.

Oʻzbekiston musulmonlari idorasi raisi mazkur yigʻilishda har bir imom-xatib din va mehrob omonatini chuqur his etishi, faoliyatini yaxshilab borishi, zamon bilan hamnafaslikda doimiy bilim-malakalarini oshirishi va peshvolik maqomiga munosib boʻlishini taʼkidlagan. Shuningdek, barcha imom-xatiblarni ushbu martabada shariat xodimi sifatida ixlos-u muhabbat, taqvo va sadoqat bilan xizmat qilishiga daʼvat etgan.

Yigʻilish yakunida esa masʼullarga berilgan topshiriqlar yuzasidan reja ishlab chiqish va ijrosini taʼminlash vazifalari yuklatilgan.