Asosiy olimpiadaning birinchi (maktab) bosqichi 16-30-sentyabr kunlari oʻtkaziladi.

Jumladan, 2024/2025-oʻquv yilida Asosiy olimpiadaning maktab bosqichini oʻtkazish boʻyicha tavsiyalar hamda muddatlari keltirilgan Maktabgacha va maktab taʼlimi vazirligining (2024-yil 9-sentyabrdagi 02-31-1335-sonli xat) xati hududlarga yuborilgan.

Unda keltirilishicha, olimpiadalar 17 ta fan boʻyicha tashkil etiladi.

Olimpiada oʻtkaziladigan joy va muddatlari boʻyicha barcha oʻquvchilar olimpiadadan kamida 3 kun oldin (eʼlonlar taxtasi, ijtimoiy tarmoqlar va Telegram guruhlarga eʼlon joylashtirish, fan oʻqituvchilari tomonidan mashgʻulotlar vaqtida, umumiy saflanishda ogʻzaki eʼlon qilish va boshqalar) xabardor qilinishi shart.

Bellashuvlarda har bir fan va sinf kesimida ishtirokchilar qatnashib, ular orasidan ballar ketma-ketligida 3 nafargacha gʻolib aniqlanadi hamda asosiy olimpiadaning keyingi bosqichida ishtirok etish uchun tavsiya etiladi.

Tavsiya etilgan oʻquvchilar hamda ularning oʻqituvchilari haqidagi maʼlumotlar esa Maktabgacha va maktab taʼlimi vazirligining olympiad.uzedu.uz axborot tizimiga joylashtirilishi zarur.