Sankt-Peterburgda ota-onasi va qonuniy vakillari mavjud boʻlmagan 14 nafar voyaga yetmagan fuqaro Vatanga qaytarildi, deya maʼlum qildi “Dunyo” AA.

Xabarga koʻra, aksariyat bolalarning ota-onalari muqaddam Rossiya hududida boʻlish tartibini buzganligi sababli mamlakatdan chiqarib yuborilgan.

Taʼkidlanishicha, bolalarni Oʻzbekistonga qaytarish uchun Bosh konsulxonada guvohnomalari rasmiylashtirilgan va Oʻzbekiston Ichki ishlar vazirligi masʼul xodimlariga topshirilgan.

Yakunda Sankt-Peterburg davlat byudjet tashkiloti yetim bolalar va ota-ona qaramogʻisiz qolgan bolalarni saqlash markaziga oʻzbekistonlik bolalarga koʻrsatgan gʻamxoʻrligi va yaqindan hamkorligi uchun alohida minnatdorlik bildirilgan.