Kontrakt toʻlovini amalga oshirish muddatlari aniq boʻldi. Bu haqida Oliy taʼlim, fan va innovatsiyalar vazirligi maʼlum qildi.

Xabarga koʻra, 2024/2025-oʻquv yilidan boshlab respublika davlat oliy taʼlim muassasalariga toʻlov-kontrakt asosida talabalikka tavsiya etilgan abituriyentlar hamda tahsil olayotgan talabalar uchun toʻlov muddatlari quyidagicha:

◾️ belgilangan toʻlov miqdorining kamida 25 foizi talabalikka tavsiya etilgan abituriyentlar uchun 2024-yil 15-sentyabrgacha yoki Oʻzbekiston Respublikasi taʼlim tashkilotlariga qabul qilish boʻyicha davlat komissiyasi tomonidan belgilangan muddatgacha;

Ma'lumot uchun, ikkinchi va undan yuqori kurs talabalari uchun esa ushbu 25 foizli summa 2024-yil 1-oktyabrgacha yoki oliy taʼlim muassasasi rektori (direktori) tomonidan uzaytiriladigan muddatgacha to'lanishi kerak.

◾️ belgilangan toʻlov miqdorining kamida 50 foizi 2025-yil 1-yanvargacha;

◾️ belgilangan toʻlov miqdorining kamida 75 foizi 2025-yil 1-martgacha;

◾️ belgilangan toʻlov miqdorining 100 foizi 2025-yil 1-maygacha yoki oliy taʼlim muassasasi rektori (direktori) tomonidan uzaytiriladigan muddatgacha to'lanishi shart.

Taʼkidlanishicha, mazkur tartib moliyaviy mustaqillik berilgan davlat oliy taʼlim muassasalari uchun tavsiyaviy xarakterga ega.