Toshkent shahar Shayxontohur tumanida joylashgan Chorsu bozori hududidagi kiyim doʻkonlarining birida yongʻin chiqdi. Toshkent shahar FVB holat yuzasidan maʼlumot berdi.

Maʼlum boʻlishicha, 25-avgust kuni soat 20:48 da Toshkent shahar Shayxontohur tumani Zarqaynar koʻchasida joylashgan doʻkonlarning birida yongʻin sodir boʻlayotgani toʻgʻrisida Toshkent shahar FVBga xabar kelib tushgan.

Shundan soʻng, yongʻin-qutqaruv texnikalari aytilgan manzilga soat 20:53 da yetib borgan va yongʻin soat 21:06 da oʻchirilgan.

Yongʻin natijasida kiyim doʻkonining ichki qismi (15 kv/m. maydon) zarar koʻrgan.

Hozirda yongʻin sababi va moddiy zarar miqdori aniqlanmoqda.

Hodisa oqibatida halok boʻlgan va jabrlanganlar yoʻq.