2024-yil birinchi yarim yilligi uchun moliyaviy hisoboti tahlil qilinganda UzAuto Motors rekord darajada foyda olgani maʼlum boʻldi.

Banker kanalining taqdim qilgan maʼlumotiga koʻra, kompaniya foydasi ushbu davrda 1,9 trln soʻm boʻlgan. Yaʼni, oʻsish koʻrsatkichi 65 foizdan yuqori boʻlgan.

Hisobotda keltirilishicha, UzAuto quyidagi koʻrinishda foyda olmoqda:

▪️ daqiqasiga – 7,3 mln soʻm;

▪️ soatiga – 436,7 mln soʻm;

▪️ kuniga – 10,4 mlrd soʻm;

▪️ oyiga – 318,8 mlrd soʻm.

2023-yilga qaralsa, kompaniya 1,9 trln soʻmlik sof foydaga 9 oy davomida erishgan. Bu yil esa mazkur koʻrsatgich uchun 6 oy kifoya qilgan.

Shunday boʻlsa-da, UzAuto davlatga 1,1 trln soʻmlik soliq ham toʻlagan. Shuningdek, 281,8 mlrd soʻmlik soliq imtiyozlaridan foydalangan.

Kanalning yozishicha, 2024-yil UzAuto Motors uchun oʻz tarixidagi eng muvaffaqiyatli yil boʻlishi mumkin.