Raqobat qoʻmitasi tomonidan Oʻzbekistondagi barcha telekanallar reklamalarni tartibga solish boʻyicha ogohlantirildi.

Maʼlum boʻlishicha, oxirgi vaqtlarda ommaviy axborot vositalari (xususan, telekanallar) reklamalarni tarqatishda (joylashtirishda) qonunchilik talablarini buzmoqda.

Shu bois Qoʻmita raqamli televideniye xizmatlarini koʻrsatuvchi provayderlarga (teleradiokanallar) koʻrsatma xati yubordi.

Maʼlum boʻlishicha, koʻrsatmada reklama qonunchiligi talablarini bajarish soʻralgan.

“Koʻrsatmada telekanallar bir oylik muddatda reklamaga oid oʻz faoliyatini amaldagi qonunchilik talablaridan kelib chiqib muvofiqlashtirishi va qayta koʻrib chiqishi soʻralgan”, deyiladi xabarda.

Taʼkidlanishicha, ushbu koʻrsatma xati talabalaridan kelib chiqib, Qoʻmita oʻz vakolatlari doirasida belgilangan tartibda sohaga oid monitoring tahlillari oʻtkazadi.

Agar oʻrganishlarda qonun buzilishi aniqlansa, mazkur holatga yoʻl qoʻygan subyektlarga nisbatan qatʼiy taʼsirchan choralar, jumladan, moliyaviy sanksiyalar qoʻllaniladi.