Buxoroda “tanish-bilishchilik” qilib, javobgarlikdan qutilib qolmoqchi boʻlgan haydovchining telefonini oʻchirib qoʻygan YPX xodimi taqdirlandi.

Ijtimoiy tarmoqlarda tarqalgan videoga koʻra, qoidani buzgan haydovchi vaziyatdan quruq chiqib ketmoqchi boʻlgan. Shu sababli u tanishiga qoʻngʻiroq qilgan va uni YPX xodimiga tutgan. Biroq xodim gaplashmasligini bildirgan hamda telefonni oʻchirgan.

Maʼlum boʻlishicha, mazkur xodim Buxoro viloyati Gʻijduvon tumani IIB JXX YHXB yoʻl-patrul xizmati inspektori safdor Sunnat Ergashev boʻlgan.

Oʻz xizmat vazifasiga vijdonan yondashib, hamkasblariga oʻrnak boʻlgani uchun Ergashev IIV JXX YHXX rahbariyati tomonidan 3 mln soʻm pul mukofoti bilan ragʻbatlantirilgan.

Ragʻbatlantirish Buxoro viloyati IIB JXX YHXB boshligʻi tomonidan shaxsiy tarkib bilan oʻtkazilgan yoʻriqnomada tantanali topshirilgan.