Vazirlar Mahkamasi qarori bilan quyidagi holatlarda abituriyent test sinovlari jarayonidan chetlashtiriladi va natijalari hisobga olinmaydi:

▪️ test sinovlari oʻtkaziladigan hududga yoki binoga kirishda mikrokalkulyator, lugʻat, jadval, kitob, uyali telefon, kompyuter, telekommunikatsiya qurilmalari va boshqa vositalar, shpargalkalar olib kirishga harakat qilsa, olib kirgan boʻlsa yoki ulardan test sinovlari davomida foydalansa;

▪️ test materiallarini boshqa abituriyentga uzatsa yoki ularga yordam bersa;

▪️ test sinovlari jarayonida bir-biri bilan gaplashsa;

▪️ test materiallarini binodan tashqariga olib chiqsa, test topshiriqlari kitobi varagʻini yirtsa;

▪️ test sinovlari uchun ajratilgan vaqt tugagandan soʻng test materiallarini topshirishdan bosh tortsa;

▪️ test sinovlari jarayonida videokuzatuvlar orqali abituriyentning tartib va qoidalarga amal qilmaganligi aniqlansa.

Bundan tashqari, abituriyentning test sinovlarini topshirish vaqtida guruhdan chiqishi taqiqlanadi va chiqib ketgan abituriyentlar qaytadan test sinovlariga qoʻyilmaydi.

Eslatma! Test materiallarisiz, guruh nazoratchisi kuzatuvi ostida guruhdan chiqish hollari bundan mustasno.

Oldinroq abituriyentlar testga nimalarni olib kirishi mumkinligi haqida xabar berilgan edi.