Sogʻliqni saqlash vazirligi tizimidagi oliygohlarga kirish imtihonlari 14-28 iyul kunlari oʻtkazilishi, shundan keyin 30 iyul – 13 avgust kunlari abituriyentlarga yoʻnalish tanlash imkoni berilishi, mandat esa 21-22 avgustda eʼlon qilinishi kutilmoqda.

Sogʻliqni saqlash vazirligi tizimidagi oliy taʼlim muassasalarida kirish test sinovlari 2024-yil 14-iyuldan 28-iyulga qadar oʻtkazilishi rejalashtirilgan. Bu haqda vazirlik matbuot xizmati xabar berdi.

Ayni paytda, Oliy taʼlim, fan va innovatsiyalar vazirligi Kun.uz nashri soʻroviga javoban imtihonlar va mandat sanalari hali tasdiqlanmaganini bildirgan.

SSVning maʼlum qilishicha, imtihonlar 28-iyulda yakunlanadi va abituriyentlar 30-iyuldan boshlab 15 kun davomida yoʻnalish tanlashi mumkin boʻladi.

13-avgustda (shu kuni ham tanlash mumkin boʻladi) ushbu muddat yakunlanadi.

7 kunlik muddatdan soʻng mandat hisoblanib, 21-22 avgustda natijalar eʼlon qilinadi.