Prezident Qarori bilan 2024/2025-oʻquv yilidan boshlab maktablarda ota-onalarning farzand tarbiyasi borasidagi bilimini oshirishga qaratilgan “Namunali ota-onalar maktabi” loyihasi amalga oshiriladi.

Mazkur taʼlim maskanlarida “Farzand tarbiyasida ota-onaning masʼuliyati” mavzusida tarbiya haftaliklari ham oʻtkaziladi.

Bundan tashqari, 2024-yil 1-dekabrgacha:

➖ oʻquvchilarda “huquqbuzarlikka qarshi immunitet”ni shakllantirishda “maktab – ota-ona – mahalla” hamkorligi zanjirini yaratish boʻyicha ilmiy asoslangan oʻquv va ommabop uslubiy tavsiyalar ishlab chiqiladi;

➖ ota-onalarning farzand tarbiyasiga oid dunyoqarashini kengaytirishga xizmat qiladigan xalqchil tildagi adabiyotlar yaratiladi.

Joriy yilning dekabr oyida esa “Tarbiya – shaxs madaniy-maʼnaviy kamolotining mezoni” mavzusida xalqaro forum oʻtkaziladi.

Shuningdek, qarorga binoan 2025-yil yakunigacha ota-onalar, oʻqituvchilar va oʻquvchilar uchun yoshlar tarbiyasiga oid raqamli kontentlarni joylashtirish maqsadida “milliytarbiya.uz” elektron platformasi va uning mobil versiyasi ishlab chiqiladi.