Sadir Japarovning yaqin kelajakda Oʻzbekistonga davlat tashrifi bilan kelishi rejalashtirilmoqda. Bu haqida Qirgʻiziston Respublikasi Iqtisodiyot va savdo vaziri oʻrinbosari Sanjar Bolotov maʼlum qilgan.

Rasmiyning taʼkidlashicha, davlat rahbarlarining boʻlajak uchrashuvi mamlakatlar oʻrtasidagi doʻstona aloqalarni mustahkamlash, qoʻshnichilik va oʻzaro manfaatli munosabatlarni yanada rivojlantirishda muhim omil boʻladi.

“Prezidentlar oldimizga mamlakatlar oʻrtasidagi tovar ayirboshlash hajmini 2 milliard AQSh dollariga yetkazish vazifasini qoʻydi. Bu qiyin, ammo erishish mumkin boʻlgan maqsad. Bunga erishish uchun birgalikda harakat qilishimiz, barcha mavjud vosita va mexanizmlardan foydalanishimiz kerak. Ishonchim komilki, birgalikdagi saʼy-harakatlar bilan biz nafaqat bunga erishamiz, balki mazkur koʻrsatkichdan ham oshib ketamiz, — degan vazir oʻrinbosari.