2022-yilda Oʻzbekiston aholining mobil telefonlar bilan taʼminlanishi boʻyicha Mustaqil Davlatlar Hamdoʻstligi tashkiloti tarkibiga kirgan davlatlar orasida birinchi oʻrinni egallagan, deb xabar berdi MDH Xalqaro statistika qoʻmitasi.

Tahlilga koʻra, bundan taxminan 2 yil oldin har 100 ta oʻzbek oilasiga 309 ta telefon toʻgʻri kelgan. Yaʼni, bu 2022-yilda har 1 ta oilada 3 ta telefon bor edi degani.

Mazkur statistik maʼlumotda Qozogʻiston 2-oʻrindagi davlat deb koʻrsatilgan. 2022-yilda har 100 ta qozoq oilasida 264 ta telefon boʻlgani aytiladi.

Rossiyada esa har 100 ta oilaga 248 ta, Qirgʻizistonda esa 245 ta telefon toʻgʻri kelgan.

Maʼlum boʻlishicha, bu maʼlumotlar MDH Davlatlararo statistika qoʻmitasining “Mustaqil Davlatlar Hamdoʻstligi mamlakatlarida aholi, bandlik va turmush sharoiti 2022” toʻplamida eʼlon qilingan.