Ayni vaqtda Sirdaryo viloyatining Sayxunobod tumanida Prezident raisligida videoselektor yigʻilishi boʻlib oʻtmoqda.

Davlatimiz rahbari nega aynan shu tumanga kelganini izohlar ekan, joylardagi va respublika darajasidagi rahbarlar Sayxunoboddagi ahvolni yaxshilashga eʼtibor qaratmagani, pastga tushib ishlamagani, faqat yigʻilish oʻtkazish bilan cheklanganini tanqid qildi.

Maʼlum boʻlishicha, tumanda 2 ming 400 nafar ishsiz bor. Kambagʻallik darajasi esa 14 foizni tashkil qiladi. Mahalliy byudjet tushumi 27 mlrd soʻm boʻlsa-da, xarajati 67 mlrd soʻm.

“Bir soʻz bilan aytganda, Sayxunobodda tadbirkorlik oʻsmayapti, Yangi Oʻzbekiston nafasi sezilmayapti”, – degan Prezident yigʻilish davomida.

Shavkat Mirziyoyev shu sababli viloyat hokimining birinchi oʻrinbosari, Sayxunobod tumani hokimi va uning birinchi oʻrinbosari lavozimidan ozod etilib, oʻrniga zamonaviy rahbarlar qoʻyilganini taʼkidlab oʻtdi.