Oʻzbekiston va Ozarbayjon hukumatlari oʻrtasida fuqarolarning vizasiz safar qilishlariga oid hujjat kuchga kirdi, deb xabar berdi IIV axborot xizmati.

Qayd etilishicha, 1997-yil 18-iyunda imzolangan Oʻzbekiston hukumati bilan Ozarbayjon hukumati oʻrtasida Oʻzbekiston va Ozarbayjon fuqarolarining vizasiz safar qilishlari toʻgʻrisidagi bitimga qoʻshimchalar hamda oʻzgartirish kiritish toʻgʻrisida bayonnoma kuchga kirdi.

Mazkur bayonnoma 2023-yil 22-avgustda Ozarbayjonning Boku shahrida imzolanib, 15-yanvarda kuchga kirdi.

Ushbu bayonnoma ikki respublika fuqarolari uchun qulay shart-sharoitlar yaratishga qaratilgan boʻlib, Oʻzbekiston va Ozarbayjon hududiga kirish/chiqish, tranzit oʻtish va 15 kun muddatga oʻzlari boʻlib turgan davlatning vakolatli organlarida roʻyxatdan oʻtish majburiyatidan ozod etilishi belgilandi.