Ijtimoiy tarmoqlarda Namangan shahridagi 51-sonli davlat maktabgacha taʼlim tashkiloti xodimlarini direktor majburiy mehnatga jalb etgani haqida xabar tarqaldi.

Maʼlum boʻlishicha, tashkilotda qurilish jarayonidan qolgan taxtalar yoyilib yotmasligi, zanglagan mixdan kimdir zararlanmasligi uchun bogʻcha direktori tomonidan taxtalarni bir chetga olib qoʻyish boʻyicha koʻrsatma berilgan.

Oʻz vazifasiga sovuqqonlik bilan qaragani, oʻziga yuklatilgan vazifalarni lozim darajada bajarmaganligi uchun maktabgacha taʼlim tashkiloti direktoriga hayfsan intizomiy jazo chorasi qoʻllanilgan.

“Mehnat qonunchiligi doirasida taʼlim tashkiloti xodimlarini majburiy mehnat va boshqa jamoat ishlariga jalb etishga yoʻl qoʻymaslik viloyat maktabgacha va maktab taʼlimi boshqarmasining doimiy diqqat-markazida va bu masala jiddiy eʼtiborda ekanligi maʼlum qilinadi”, – deyiladi xabarda.