IES havoni ifloslantirib, atrof-muhitga zarar keltirgan

Ijtimoiy tarmoqlarda Yangi Angren IES bilan bogʻliq murojaat tarqalgan edi. Holat Toshkent viloyati Ekologiya boshqarmasi tomonidan oʻrganilgan.

Xabarda aytilishicha, tekshiruv davomida atmosfera havosiga tashlanayotgan zararli moddalar belgilangan meʼyorlarga nisbatan yuqori ekanligi aniqlandi. Shu bilan birga, chang gaz tozalash uskunalari (filtrlari) samaradorligi 80 foizga tushib ketgan.

Oqibatda, Yangi Angren IES atmosfera havosini zararli moddalar bilan ifloslantirganligi uchun 887 million, sanoat chiqindilarini belgilanmagan joyga joylashtirganligi uchun 116 million, jami 1 milliard 3 million soʻm kompensatsiya toʻlaydigan boʻldi.

Shuningdek, 11 nafar mansabdor shaxslarga nisbatan tegishli choralar koʻrish yuzasidan huquqni muhofaza qilish organlariga murojaat qilingan.