Shahrisabz tumanida alkogol mahsulotlari ishlab chiqarayotgan yashirin seh aniqlangan. Bu haqda Bosh prokuratura huzuridagi departament xabar bermoqda. 

Departamentning Shahrisabz tuman boʻlimi tomonidan IIB xodimlari bilan hamkorlikda oʻtkazilgan tezkor tadbirda “Yangibogʻ” MFYda yashovchi N.Y. oʻz uyida yashirin seh tashkil qilib, qoʻlbola usulda alkogol mahsulotlari ishlab chiqarayotganligi aniqlanib, ushbu xonadondan 1 215 dona qalbaki aksiz marka, 242 dona alkogol, 140 litr spirt, 250 dona “QR kod” markirovka, 1 000 dona boʻsh shisha idish, qadoqlash uskunalari va boshqa ishlab chiqarishda foydalanilgan tovar moddiy boyliklar ashyoviy dalil sifatida olingan.

Qayd etilishicha, mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qogʻozlar yasash, ularni oʻtkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qoʻzgʻatilib, tergov harakatlari oʻtkazilmoqda.