“O‘zgidromet” O‘zbekiston bo‘yicha 2023-yil 29-31-dekabr va 2024-yil 1-2-yanvar kunlariga ob-havo prognozini e’lon qildi.

Bugun, 29 dekabr kuni respublika hududiga sovuq va nam havo kirib kelmoqda. Ertalab respublika bo‘yicha ba’zi joylarda yomg‘ir yog‘ishi, tog‘larda yog‘ingarchilik (yomg‘ir, qor) boshlandi.

"O‘zgidromet" xabariga ko‘ra, kun davomida havo harorati asta-sekin pasayadi, kunning ikkinchi yarmida esa +0...+5 darajagacha tushadi. Yomg‘ir yog‘ishi davom etadi va respublika bo‘yicha ba’zi joylarda yomg‘ir qorga aylanadi. Tog‘li hududlarda ba’zi joylarda yog‘ingarchilik kuchli bo‘ladi.

Respublika bo‘yicha ba’zi joylarda shamol tezligi 17-22 m/s gacha kuchayishi kutilmoqda.

Ertaga, 30 dekabr kuni O‘zbekiston hududi bo‘yicha nisbatan sovuq ob-havo bo‘ladi, yog‘ingarchilik kutilmaydi, faqat respublikaning tog‘li hududlarida ba’zi joylarda biroz qor yog‘ishi mumkin. Harorat kechasi -0...-5 darajagacha, shimolda -6...-9 darajagacha pasayadi, kunduzi +2...+7 daraja atrofida bo‘ladi.

31 dekabr va 1 yanvar kunlari respublikaning barcha hududlarida yog‘ingarchiliksiz ob-havo bo‘lishi kutilmoqda.

Kechalari sovuq saqlanib turadi, kunduz kunlari esa havo harorati asta-sekin ko‘tariladi va 1 yanvarga borib +10...+13 darajaga yetadi.

Quruq ob-havo 2 yanvarda ham saqlanib turadi, lekin biroz sovuq havo kirib kelishi hisobiga kunduzgi harorat +6...+9 darajagacha pasayadi.

Respublika bo‘yicha ba’zi joylarga tuman tushishi kutilmoqda.

Poytaxtda 29 dekabr kuni yomg‘ir yog‘adi, qorga aylanadi. Shamol g‘arbdan 3-8 m/s tezlikda esadi, vaqti-vaqti bilan 12-15 m/s gacha kuchayadi. Kunning ikkinchi yarmida harorat +0...+2 darajagacha pasayadi.

30-31 dekabr va 1-2 yanvar kunlari yog‘ingarchilik kutilmaydi. Kechasi va ertalab tuman tushishi mumkin.

Harorat 30 dekabrda kechasi -1...-3 daraja, kunduzi +4...+6 daraja, 31 dekabr va 1-2 yanvarda kechalari -3...+2 daraja bo‘ladi, 31 dekabr va 1 yanvarda kunduz kunlari +11...+13 darajagacha asta-sekin ko‘tariladi, 2 yanvarda +7...+9 daraja bo‘ladi.