Respublika Ma’naviyat va ma’rifat markazi, Isteʼdodli yoshlarni qoʼllab-quvvatlash "Ulugʼbek" jamgʼarmasi, Oliy tа'lim, fаn vа innovаtsiyalаr vаzirligi hamda“Marifat” targ‘ibotchilar jamiyati tomonidan 2023-yil 26-dekabr kuni Isteʼdodli yoshlarni qoʼllab-quvvatlash "Ulugʼbek" jamgʼarmasi anjumanlar zalida “Iste’dodli yoshlar va yosh targ‘ibotchilar forumi” oʼtkazildi.

Mazkur forumda davlat va jamoat tashkilotlari vakillari, olimlar va ziyolilar, ommaviy axborot vositalari vakillari hamda “Marifat” targ‘ibotchilar jamiyati huzurida tashkil etilgan “Yosh targ‘ibotchilar harakati” aʼzolari va oliy oʼquv yurtlari talabalari ishtirok etdi.  

Tadbirni Iste’dodli yoshlarni qo‘llab-quvvatlash “Ulug‘bek” jamg‘armasi raisi, akademik Oqil Salimov hamda Respublika Ma’naviyat va ma’rifat markazi rahbari, senator Minhojiddin Mirzo ochib berdi.

Tadbirda O‘zbekistonda barkamol avlodni shakllantirish, yoshlarni ma’naviy-axloqiy va jismonan sog‘lom etib tarbiyalash, ularni olib borilayotgan islohotlarning faol ishtirokchisiga aylantirishga qaratilgan chora-tadbirlar izchil amalga oshirilayotgani ta’kidlandi.

Jumladan, Respublika Ma’naviyat va ma’rifat markazi tomonidan yuksak ma’naviyatli, qat’iy hayotiy pozitsiya, keng dunyoqarashga ega bo‘lgan fidoyi va vatanparvar yoshlarni tarbiyalash, yoshlarni yot g‘oyalar ta’siridan himoya qilish, ularni milliy va umuminsoniy qadriyatlarga sodiqlik, diniy bag‘rikenglik va millatlararo totuvlik ruhida tarbiyalash maqsadida Respublikamizning barcha hududlarida “Yangi O‘zbekiston yoshlari birlashaylik!” shiori ostida “Yoshlar oyligi” o‘tkazgan.

Yoshlarni har tomonlama qo‘llab-quvvatlash, ulg‘ayib kelayotgan avlodning ilm-fanga bo‘lgan qiziqishini yanada oshirish, ularning intellektual va ijodiy salohiyatini ro‘yobga chiqarish maqsadida “Ma’rifat” targ‘ibotchilar jamiyati huzurida 40 nafar iqtidorli yoshlardan iborat “Yosh targ‘ibotchilar harakati” tashkil etilib, ularga “Ma’rifat” targ‘ibotchilar jamiyatining ko‘krak nishoni va a’zolik guvohnomasi topshirildi.

Forumda Yoshlar bilan muloqot, savol-javob amalga oshirildi. Ishtirokchilarga Respublika Ma’naviyat va ma’rifat markazi tomonidan kitoblar taqdim etildi.