Qashqadaryoda togʻaning bir buyragi jiyaniga, singilniki esa akasiga koʻchirib oʻtkazildi.

SSV xabar berishicha, Qashqadaryo viloyat koʻp tarmoqli tibbiyot markazida akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi mutaxassislari bilan hamkorlikda navbatdagi transplantatsiya amaliyotlari oʻtkazildi.

Kosonlik Muhriddin Gʻaniyev 28 yoshda. U bir necha yildan buyon surunkali buyrak yetishmovchiligidan aziyat chekib keladi. Bemorga 44 yoshli togʻasi Bahodir Panjiyevning buyragi koʻchirib oʻtkazildi.

Ayni paytda togʻa-jiyan oʻzlarini yaxshi his etmoqda.

27 yoshli Baxtiyor Egamov 2018-yildan buyon buyrak xastaligi bois gemodializ muolajalarini olib kelar edi. Chuqur tahlil va tekshiruvlardan soʻng unga 25 yoshli singlisi Nigoraning buyragi mos kelishi aniqlandi. Murakkab jarrohlik amaliyoti muvaffaqiyatli yakunlangan.