Iqtisodiy tadqiqotlar va islohotlar markazi oʻzining navbatdagi sharhida koʻchmas mulk bozorida yuz bergan oʻzgarishlarni tahlil qildi.

Noyabr oyida Oʻzbekiston koʻchmas mulk bozorida ikki oylik pasayishdan faollik oʻsa boshladi. Mutaxassislar hozirgi bozor holatini oʻrtacha barqaror deb hisoblaydi.

Toshkentda noyabr oyida koʻchmas mulk savdosi 4 foizga oshdi, bu avvalgi oyga nisbatan 800 ta uy-joyga koʻproq. Oy davomida faollikning eng koʻp oʻsishi quyidagi viloyatlarda qayd etildi:

Xorazm — 23 foiz,

Namangan — 16 foiz,

Jizzax — 12 foiz.

Yil davomida uy-joy savdosi 10 foizga kamaydi. Faollikning eng koʻp pasayishini koʻrsatgan hududlar Navoiy va Jizzax viloyatlari boʻlib, mos ravishda 23 foiz va 18 foizga pasaygan. Poytaxtda sotuvlar oʻtgan yilga nisbatan 24 foizga kamaydi.

Toshkentda uy-joy ijarasi bozoridagi vaziyat

Noyabr oyida Toshkent shahrida ijaraning oʻrtacha narxi oktyabr oyidagi 9,5 dollarga nisbatan 2,1 foizga biroz pasaydi va 1 kvadrat metr uchun 9,3 dollarni tashkil etdi. Poytaxtning 11 ta tumanidan 10 tasida ijara narxining pasayishi qayd etildi.

Ijara uchun eng qimmat hududlar Shayxontohur (kvadrat metr 11,6 dollar), Yakkasaroy (10,9 dollar) va Mirobod (11,5 dollar) tumanlari boʻldi.

Poytaxtdagi uy-joy ijarasi Uchtepa (8,1 dollar), Sergeli (7,1 dollar) va Bektemir (6,2 dollar) tumanlarida eng maqbul narxlarda qolmoqda. Shu bilan birga, poytaxtda oʻrtacha ijara narxi oʻtgan yilga nisbatan 6,1 foizga kamaydi. Yil boshidan buyon ijaraning oʻrtacha narxi 9,2 foizga kamaydi.

Toshkentda ijara narxi bir oy ichida faqat Bektemir tumanida 3,7 foizga oshdi.

Ikkilamchi koʻchmas mulk bozori

Noyabr oyida ikkilamchi bozorda uy-joy narxining oʻrtacha oʻsishi bir kvadrat metr uchun 0,7 foizni tashkil etdi, oʻtgan yilning noyabr oyidan buyon ikkilamchi uy-joy narxi deyarli 18,2 foizga oshdi.

Yil davomida Xorazm — 32,9 foiz, Toshkent — 31,0 foiz va Buxoro — 26,9 foiz viloyatlarida ikkilamchi bozorda uy-joy narxining sezilarli oʻsishi qayd etildi.

Toshkent shahrida noyabr oyi davomida ikkilamchi uy-joy narxi 0,4 foizga oshdi. Poytaxtda narxlarning eng yuqori oʻsish surʼatlari Shayxontohur — 1,7 foiz, Yunusobod — 1,6 foiz va Sergeli — 1,5 foiz tumanlarida kuzatildi.

Yil davomida poytaxtda ikkilamchi uy-joylarning oʻrtacha narxi 22,8 foizga oshdi.