Xalq deputatlari Toshkent shahar kengashi 19-sentabr kungi qarori bilan poytaxtga mavsumiy gullar ekish uchun 12 mlrd soʻm ajratilishi maʼqullagandi. Kengash 29-noyabr kuni bu mablagʻlarning 5 mlrd soʻmini taqsimlash toʻgʻrisida qaror chiqardi.

5 mlrd soʻmlik xarajatlar paketining manbasi – respublika budjetining 2023-yil 3-chorak daromadlar rejasining orttirib bajarilgan qismidan Toshkent shahar mahalliy budjetiga ajratilgan mablagʻlardir.

Ajratilayotgan mablagʻlar taqsimoti quyidagicha:

poytaxtning 12 ta tumani obodonlashtirish boshqarmalariga (taqsimoti quyidagi jadvalda) – 2,73 mlrd soʻm;

Irrigatsiya xoʻjaligi va koʻkalamzorlashtirish obyektlarini taʼmirlash ixtisoslashtirilgan boshqarmasiga – 1,4 mlrd soʻm;

Markaziy maydonlarni obodonlashtirish ixtisoslashtirilgan boshqarmasiga – 550 mln soʻm;

Hukumat obyektlariga xizmat koʻrsatish ixtisoslashtirilgan boshqarmasiga – 250 mln soʻm;

Fuqarolarga xizmat koʻrsatish boshqarmasiga – 70 mln soʻm.

Tumanlar kesimida gul ekish uchun eng koʻp mablagʻ Mirzo Ulugʻbek (500 mln soʻm) va Chilonzor (400 mln soʻm) tumanlariga berilmoqda. Eng kam mablagʻ – Bektemir (100 mln soʻm), Yangihayot va Uchtepa tumanlariga (130 mln soʻmdan) ajratiladi.