Toshkentda 11—12-dekabr kunlari “Jadidlar: milliy oʻzlik, istiqlol va davlatchilik gʻoyalari” mavzusida ilmiy konferensiya boʻlib oʻtadi.

Ushbu konferensiya Milliy mass-mediani qoʻllab-quvvatlash va rivojlantirish jamoat fondi, Vazirlar Mahkamasi huzuridagi Qatagʻon qurbonlari xotirasi davlat muzeyi, Fanlar akademiyasi Tarix instituti va Turkiy davlatlar tashkiloti hamkorligida tashkil etiladi.

Konferensiyaning birinchi kunida — jadidchilik harakati gʻoyasi, maqsad va vazifalarini izchil oʻrganishda yangi insaydlar, harakatning maʼrifat va noshirlik sohasidagi hissasi, milliy davlatchilik shakllanishi boʻyicha ijtimoiy-siyosiy saʼy-harakatlari, shuningdek, jadidlarning ilmiy va madaniy merosi, ularning tadqiqotlari borasida fikr almashiladi.

Tadbirning ikkinchi kunida — oʻzbekistonlik hamda chet ellik taniqli olimlar, tarix sohasi vakillari bilan davra suhbati (panel session) oʻtkaziladi va u keng jamoatchilik uchun ham ochiq hisoblanadi.

Uchrashuvda olimlar Temur Xoʻjaoʻgʻli, Adib Xalid, Hisao Komatsu, Zaynobiddin Abdirashidov va dunyo boʻylab mashhur tarixiy seriallar muallifi Mehmet Boʻzdogʻ ishtirok etadi.

Konferensiya haqida batafsil maʼlumotni jadidconf.com saytidan olish, tadbirning ikkinchi kunida ishtirok etish uchun roʻyxatdan oʻtish mumkin.