Qoraqalpogʻiston Respublikasida joylashgan avtomobillarga gaz toʻldirish kompressor stansiyalari tun-u kun rejimidan soat 6:00 dan 15:00 gacha ishlash rejimiga oʻtmoqda. Bu haqda “Hududgaz Qoraqalpogʻiston”ga tayanib, KRuz.uz xabar berdi.

Bu cheklov 9–14-dekabr kunlari havo keskin sovib ketishi munosabati bilan isteʼmolchilarning tabiiy gazga talabi ortib, magistral tarmoqlarda gaz bosimi pasayishining oldini olish maqsadida kiritilgan.

Bungacha 4-dekabrdan boshlab Andijon viloyatidagi AGTKShlar ish vaqti 6:00 dan 15:00 gacha cheklangandi.

Ayni paytda ijtimoiy tarmoqlarda Toshkent shahridagi gaz quyish shoxobchalari faoliyatida ham uzilishlar kuzatila boshlagani haqida maʼlumotlar bor.

Shuningdek, Surxondaryo viloyatida metan gaz quyish shoxobchalari soat 8:00 dan 17:00 gacha faoliyat yuritayotgani aytilmoqda.