Ijtimoiy tarmoqlarda bir ayolning 3 nafar kichik yoshdagi bolalarga nisbatan shafqatsiz muomalada boʻlib, ularni yoqib yuborish bilan bevosita tahdid qilishi aks etgan video tarqaldi.

Dastlabki maʼlumotlarga koʻra, mazkur holat Xorazm viloyati, Urganch tumanida sodir boʻlgan. Hozirda ushbu holatni toʻla aniqlash boʻyicha ichki ishlar organlari tomonidan zudlik bilan surishtiruv ishlari olib borishga kirishilgan.

Hodisa Bolalar ombudsmanining alohida nazoratiga olingani aytilmoqda.

“Bolalarga nisbatan bunday jinoiy harakatlar ularning ota-onasi yoki boshqa yaqin qarindoshlari tomonidan sodir etilishidan qatʼiy nazar, aybdor shaxslarni qonunda koʻzda tutilgan javobgarlikka tortish choralari koʻrilishi taʼminlanadi. Bolaning hayoti va sogʻligʻi davlat himoyasidadir”, deyiladi xabarda.

Holat boʻyicha qoʻshimcha maʼlumot berilishi maʼlum qilingan.