Oʻzbekistonning AQSHdagi elchisi Furqat Siddiqov oʻrindoshlik asosida mamlakatning Kanadadagi (qarorgohi Vashingtonda) elchisi etib tayinlandi.

Furqat Siddiqov may oyida Oʻzbekistonning AQSHdagi elchisi sifatida prezident Jo Baydenga ishonch yorliqlarini topshirgan edi. Shuningdek, u oktabr oyida Oʻzbekistonning Braziliyadagi elchisi (qarorgohi Vashingtonda) etib tayinlangani toʻgʻrisidagi ishonch yorligʻi nusxasini topshirgan.

Furqat Siddiqov bungacha Oʻzbekiston tashqi ishlar vazirining birinchi oʻrinbosari lavozimida ishlagan. U 1993-yilda Toshkent davlat texnika universitetini tamomlagan. Mehnat faoliyati davomida “OʻzDeuElektroniks” QK, Oʻzbekiston prezidenti huzuridagi Strategik va mintaqalararo tadqiqotlar institutida ishlagan.

2002-yildan beri TIV tizimida turli lavozimlarda faoliyat koʻrsatib kelmoqda. Xususan, Oʻzbekistonning AQSHdagi elchixonasida, Pokistondagi elchi, vazirning oʻrinbosari va birinchi oʻrinbosari lavozimlarida ishlagan.