Oʻzbekiston Respublikasi Prezidenti Shavkat Mirziyoyev 8-noyabr kuni Iqtisodiy hamkorlik tashkiloti (IHT) bosh kotibi Xusrav Noziriyni qabul qildi. Bu haqda davlat rahbari matbuot xizmati xabar bermoqda.

Birlashma doirasidagi amaliy hamkorlikni yanada rivojlantirish, ushbu koʻp tomonlama tuzilmalar faoliyati samaradorligini oshirish masalalari koʻrib chiqildi.

Davlat rahbari oʻzaro manfaatli hamkorlikni kengaytirish, eng avvalo, savdo, transport, investitsiyalar, innovatsiyalar, ekologiya, turizm sohalarida qoʻshma loyiha va dasturlarni amalga oshirish uchun katta salohiyat mavjudligini qayd etdi.

Bosh kotib Oʻzbekiston IHT faoliyatida faol ishtirok etayotgani, ilk bor Toshkentda “Hamkorlikda iqtisodiy barqarorlik va taraqqiyot sari” shiori ostida oʻtkaziladigan IHTning navbatdagi sammiti yuqori saviyada tayyorlangani uchun samimiy minnatdorlik bildirdi.

Mamlakatimizning 2021-yilgi Ashxobod sammiti davomida ilgari surilgan tashabbuslari izchil amalga oshirilayotgani katta mamnuniyat bilan qayd etildi.

Uchrashuv chogʻida IHT davlatlari yetakchilarining boʻlajak Toshkent yigʻilishi kun tartibi yuzasidan fikr almashildi.