Oyina.uz portali milliy matbuot bayrami munosabati bilan “Adabiyotga kim nima bilan kirib kelgan?” mavzusida 15 nafar qalamkashni sharj qilgandi.

Kuni kecha taniqli shoir Faxriyor (Faxriddin Nizomov) Oyina.uz tahririyatiga qoʻngʻiroq qilib, o‘zining ijodiga bag‘ishlab ishlangan karikaturani sotib olish istagini bildirdi.

“Angliyada bir an’ana bor, siyosatchilar biror gazetada sharj qilinsa, o‘sha rasmni sotib olishga shoshiladi. Agar karikaturada bir necha shaxs tasvirlangan bo‘lsa, qaysi biri avval murojaat qilsa, asl nusxa o‘shanga nasib etadi. Men bir ijodkor sifatida mana shu xayrli amalning o‘zimizda ham urfga kirishini istardim”, deydi Faxriddin Nizomov. 

 

Sharj – beozor kulgu, faqat tanqid emas, balki e’tirof hamdir. Insonda hazilni tushunish hissi bo‘lishi yuksak fazilat sanaladi. Ayniqsa, o‘ziga nisbatan chetdan ozgina yumor bilan qaray bilish katta shaxslarga xos xususiyat. Mayda odamlar esa hazilni zilga aylantirib yuboradi.

 

Bizda ham amaldorlar xuddi Angliyadagiga o‘xshab, o‘ziga chizilgan karikaturalarni yaxshi qabul qilishni o‘rganishi kerak. Buning uchun, avvalo, jurnalistikamiz yuqori martabali shaxslarni sharj qilishga jur’at etishi lozim. Jamiyatimizda shunday madaniyat shakllansa, xalqqa berilgan va’dalarni bajarish oson kechadi.

Shoir Faxriyor Oyina.uz karikaturalarida tasvirlangan ijodkor do‘stlarini suratlarni sotib olish chellenjiga qo‘shilib, jamiyatimizda o‘ziga xos yangi an’anani boshlab berishga chaqirdi. Xo‘sh, navbatdagi kim?

Oyina.uz'ni Telegramda oʻqing!