Prezident topshirigʻiga asosan, afgʻon xalqiga 185 tonnadan ortiq zarur oziq-ovqat mahsulotlari ortilgan navbatdagi insonparvarlik yuklari karvoni Hayraton chegara oʻtkazish punkti orqali qoʻshni mamlakatning Balx viloyati shimolidagi Hayraton shahriga yetkazildi.

Shu munosabat bilan ikki davlat rasmiylari ishtirokida hududlarning oʻzaro savdo-iqtisodiy va gumanitar sohadagi hamkorligini rivojlantirish borasida muzokaralar oʻtkazildi. Tadbirda ishtirok etgan afgʻonistonlik rasmiylar Muborak Ramazon oyida koʻrsatilayotgan bu kabi amaliy yordam uchun Oʻzbekiston xalqiga oʻz minnatdorchiligini bildirdi.