Oliy ta’lim, fan va innovatsiyalar vazirligi “Akademik litseylarga o‘quvchilarni o‘qishga qabul qilish, o‘qishini ko‘chirish, qayta tiklash va o‘qishdan chetlatish tartibini takomillashtirish haqida”gi Vazirlar Mahkamasi qarori loyihasini muhokamaga qo‘ydi.

Unga ko‘ra:

• abituriyentlarga ro‘yxatdan o‘tishda uchtagacha akademik litseyning taʼlim tili bir xil bo‘lgan bittadan mos yo‘nalishini tanlash imkoniyati beriladi;
• abituriyent o‘zi tanlagan hududda (Qoraqalpog‘iston Respublikasi, viloyatlar markazi yoki Toshkent shahrida) tashkil etiladigan kirish test sinovlarida ishtirok etadi.

Bundan tashqari, akademik litseylarga o‘qishga qabul qilishda xalqaro va respublika fan olimpiadalari g‘oliblari, xorijiy til sertifikati mavjud abituriyentlarga imtiyozlar beriladi.

Shuningdek, qaror bilan tasdiqlanishi nazarda tutilgan nizomga ko‘ra:

• akademik litseylarga umumiy o‘rta taʼlim maktablarining 9-sinf bitiruvchilarini tanlab olish, o‘qishga qabul qilish tartibi;
• akademik litseylarda maslahat kengashlari faoliyatini tashkil etish, hujjatlarni qabul qilish, imtihonlarni o‘tkazish, rasmiylashtirish va natijalarni eʼlon qilish tartibi;
• fan olimpiadalari, tanlov g‘oliblari va umumtaʼlim fanlarini o‘zlashtirish sertifikatiga ega bo‘lganlar uchun imtiyozlarni qo‘llash;
• akademik litsey o‘quvchilarining o‘qishini ko‘chirish, qayta tiklash va o‘qishdan chetlatish tartibi belgilanadi.

2022-yil sentabrda Ta’lim inspeksiyasi tomonidan mamlakatdagi bitiruvchisi mavjud bo‘lgan 65 ta akademik litsey faoliyati samaradorligi tahlil qilinib, ta’lim sifati bo‘yicha milliy reytin tayyorlangandi. O‘shanda OTMlarga qabul qilingan o‘quvchilar ulushi bo‘yicha yetakchi o‘rinlarni “Toshkent irrigatsiya va qishloq xo‘jaligini mexanizatsiyalash muhandislari instituti” Milliy tadqiqot universitetining “International house Tashkent" akademik litseyi, Buxoro davlat universiteti akademik litseyi hamda Toshkent pediatriya tibbiyot instituti akademik litseyi egallagan edi.