Jahon banki Oʻzbekistonga uzoq muddatda pensiya yoshini oshirishni tavsiya qilgani toʻgʻrisida xabar berilgandi. Pensiya jamgʻarmasi muhokamalarga sabab boʻlgan ushbu maʼlumot yuzasidan izoh berdi.

Jamgʻarmaga koʻra, hozirda bu boʻyicha hech qanday taklif va loyiha koʻrib chiqilmayapti, shuningdek, ushbu masala kun tartibida emas.

Jahon banki “Oʻzbekistonda davlat xarajatlarini koʻrib chiqish: inson kapitali va suv infratuzilmasiga sarflangan mablagʻlar samaradorligini oshirish” hisobotini eʼlon qildi. Hisobotda keksalar sonining koʻpayishi pensiya tizimiga bosim oʻtkazayotgani, shuning uchun uni isloh qilish zarurati paydo boʻlayotgani qayd etilgan.

Maʼlumot uchun, Oʻzbekistonda ayollar 55 yoshdan, erkaklar 60 yoshdan pensiyaga chiqadi.