Oʻzbekistonda “Tutukon neo” ichish uchun eritma 250 ml dori preparatining ayrim seriyalari sotuvdan qaytarib olinmoqda.

Ushbu dori preparati “Zarur ishlab chiqarish amaliyoti (GMP)” talablari buzilgan holda ishlab chiqarilgan.

Ispaniyaning “Dori vositalari va tibbiy buyumlar agentligi” (AEMPS) qaroriga binoan, Ispaniyaning Labaratorio Miquel Y Garriga Inc, S.L. korxonasi tomonidan chiqarilgan “Tutukon neo” ichish uchun eritma 250 ml (flakonlarda) dori preparatining “Zarur ishlab chiqarish amaliyoti (GMP)” talablari buzilgan holda ishlab chiqarilgani aniqlangan.

Oʻzbekiston Respublikasi Sogʻliqni saqlash vazirligi huzuridagi “Dori vositalari, tibbiy buyumlar va tibbiy texnika ekspertizasi va standartlashtirish davlat markazi” yuqoridagi maʼlumotga asosan, Oʻzbekiston Respublikasi hududiga kirib kelgan quyidagi: R-049, R-050, R-051, R-078, R-080, R-222, R-236, R-081, R-124, R-204, R-205, R-206, R-218, R-219, R-220, R-221, R-223, R-224, R-225 seriyalarini farmatsevtika bozoridan muomaladan qaytarib olinayotganini maʼlum qilgan.

Eslatib oʻtamiz, Oʻzbekistonda 2022-yilda 20 nafar bolaning oʻlimiga sabab boʻlgan “Dok-1 Maks” dori vositalarini ishlab chiqargan Hindistonning Marion Biotech farmatsevtika firmasining litsenziyasi bekor qilingandi.