1-martdan AI-80 markali benzinning narxi kamida 800 soʻmga oshadi – “Oʻzbekneftgaz”

Saqlash
09:02 / 28.02.2023 1107 0

2022-yil 12-dekabrdagi PQ-440-sonli qaror bilan import qilinadigan, mahalliy korxonalar tomonidan ishlab chiqariladigan va tadbirkorlik subyektlari tomonidan yakuniy isteʼmolchilarga sotiladigan AI-80 rusumli avtobenzinga qoʻllanib kelingan “nol” stavkadagi aksiz soligʻi imtiyozi qoʻllanishi muddati 2023-yil 1-martda tugaydi.

 

“Oʻzbekneftgaz” AJga koʻra, 2023-yil 1-martda yuqoridagi tartiblarning amal qilish muddati (imtiyozli davr) yakunlangandan keyin aksiz soligʻi hisoblanishi va birjada narxlarning erkin (oʻsish darajasi cheklanmasdan) shakllanishi hisobiga AI-80 rusumli avtobenzin narxi oshishi kutilmoqda.

 

Bunda, 1-martdan boshlab birja savdolariga joylashtiriladigan 1 tonna mahalliy AI-80 rusumli avtobenzin boshlangʻich narxi 6 863 000 soʻmdan, import avtobenzini narxi 8 036 000 soʻmdan shakllanib, birja savdolari yakuni bilan narxlar oʻrtacha 8 150 000 soʻmni (1 litr uchun 6 100 soʻm) tashkil etishi kutilyapti.

 

Bunda, narxlar oʻzgarishi hisobiga “Oʻzbekneftgaz” AJ tasarrufidagi AYOQSHlarda 1 litr AI-80 rusumli avtobenzinning chakana narxi mahalliy mahsulot uchun 6 800 soʻmdan, import mahsuloti uchun 7 000 soʻmdan shakllanadi.

 

Maʼlumot uchun, Hukumatning 2022-yil 15-dekabrda tasdiqlangan “Kuz-qish mavsumida isteʼmolchilarni AI-80 rusumli avtobenzin bilan uzluksiz taʼminlash va ularning narxlari keskin oshishining oldini olish” chora-tadbirlarida 2022-yil 9-dekabrdan 2023-yil 1-martga qadar “Oʻzbekiston respublika tovar-xom ashyo birjasi” AJning alohida birja seksiyasi orqali AI-80 rusumli avtobenzin mahsulotini sotish narxining oʻsishi birja savdosiga chiqarish narxiga nisbatan koʻpi bilan 5 foizgacha miqdorda belgilangan edi.

 

1-martdan esa birjada AI-80 benzinining narxlari erkin (oʻsish darajasi cheklanmasdan) shakllantiriladi va bu shu markali benzinning narxi oshishiga sabab boʻlishi mumkin.

Izoh yo‘q

Izoh qoldirish

//