Ijtimoiy tarmoqlarda bolalar oʻgʻirligi bilan bogʻliq xabarlar tarqalmoqda. Toshkent shahri Ichki ishlar bosh boshqarmasi matbuot kotibi holat yuzasidan brifing oʻtkazdi.

Qayd etilishicha, 2023-yil boshidan buyon shu mazmundagi 6 ta xabar tarqalgan va ular oʻrganilgan. Ushbu xabarlarning hech biri oʻz tasdigʻini topmagan.

IIBBga koʻra, soʻnggi 5 yil davomida Toshkent shahrida birorta ham bola oʻgʻirlash holati qayd etilmagan.

Ammo bolalarning yoʻqolib qolishi bilan bogʻliq holatlar uchrab turadi. Xususan, 2022-yilning oʻzida Toshkent shahrida 231 nafar voyaga yetmagan bola bedarak yoʻqolgan.

Tahlillarga koʻra, aksariyat hollarda voyaga yetmaganlar oʻz ixtiyori bilan uylarini tark etgan. Yuqoridagi holatlarning barchasida bolalar topilib, oilalariga qaytarilgan.